प्यूठानमा स्कुलबाट घर फर्किँदै गर्दा बगेर बेपत्ता मध्य दुबै दाजु भाइको शव भेटिएको छ । जिल्लाको नौबहिनी गाउँपालिका–५ का ७ वर्षीय विमल खत्री र १० वर्षीय मिलन खत्री मंगलबार दिउँसो ३ बजेतिर विद्यालयबाट घर फर्किने क्रममा जोगी पनेरा खहरे खोला तर्ने क्रममा बगेका थिए । भाइ विमलको शव मंलबार बेलुका नै भेटिएको थियो ।
जिल्ला प्रहरी प्रवक्ता प्रहरी निरीक्षक हरि भट्टराईका अनुसार बेपत्तामध्य दाजु मिलनको शव बुधबार बिहान भेटिएको हो । उनीहरु दुवै स्थानीय यामबहादुर खत्रीका छोराहरु हुन् ।
दुई नाबालक छोराको एकै साथ खहरे खोलाले बगाउँदा मृत्यु भएपछि खत्री परिवार शोकमा डुबेको छ । खहरे खोलामा आएको बाढीले बगाउँदा ज्यान गुमाएका दुबै दाजु भाइ नौबहिनी गाउँपालिका–५ काँटेस्थित श्री जनता प्राथमिक विद्यालयमा अध्यनरत थिए ।
भाइ विमल कक्षा १ र दाजु मिलन कक्षा ३ मा अध्यनरत थिए । विद्यालयबाट घर फर्किदै गरेका दुई बालक खोलाले बगाएको सूचना मंगलबार बेलुकी साढे ६ बजेतिर वडा सदस्य कुलबहादुर खत्रीले प्रहरीलाई दिएका थिए ।
सूचना पाएलगत्तै प्रहरी चौकी डार्मीबाट प्रहरी सहायक निरीक्षक हरिभक्त चौधरीको नेतृत्वमा दुई जना र इलाका प्रहरी कार्यालय लुङबानेबाट प्रहरी निरीक्षक दिपेश चौधरीको नेतृत्वमा पाँच जनाको टोली खोजीका लागि खटिएको थियो ।
