धनगढी । डडेल्धुरामा प्रतिनिधिसभामा प्रधानमन्त्री तथा नेपाली कांग्रेसका सभापति शेरबहादुर देउवाविरुद्ध उम्मेदवार घोषणा गरेका नेपाली कांग्रेस (बीपी) का वरिष्ठ उपसभापति कर्ण मल्ललाई एमालेले समर्थन गर्ने निर्णय गरेको छ ।
कांग्रेसका सभापति देउवालाई साथ दिएका मल्ल यसपटक देउवासँगै प्रतिस्पर्धा गर्ने भएका हुन् । मल्ललाई नेपाली कांग्रेसले पार्टीको सदस्य समेत नरहने गरि पार्टीबाट निष्काशन गरेको थियो ।
नेपाली कांग्रेसबाट विद्रोह गरी कांग्रेस (बीपी) मा लागेका मल्लसँग गएको स्थानीय चुनावमा पनि एमालेले तालमेल गरेको थियो । त्यही तालमेललाई निरन्तरता दिँदै प्रतिनिधिसभामा मल्ललाई समर्थन गर्ने एमालेले निर्णय गरेको छ । यस अघि एमाले डडेलधुराले पूर्व प्रदेश मन्त्री पठानसिंह बोहोराको नाम एकल सिफारिस गरेको थियो ।
प्रदेशसभातर्फ क मा पठानसिंह बोहोरा र प्रदेश ख मा गजेन्द्र शाहीलाई उम्मेदवार बनाउने निर्णय पनि गरेको छ ।
