नेकपा (एमाले) का नेता माधकुमार नेपालले प्रधानमन्त्री केपी शर्मा ओली दलाल पुँजीवादको साथमा रहेको आरोप लगाएका छन् । शनिबार बानेश्वरस्थित बुद्धनगर पार्टी प्यालेसमा आयोजित काठमाडौं जिल्ला कमिटी घोषणा कार्यक्रममा नेता नेपालले ओली दलाल पुँजीवादको साथमा रहेको र आफूहरू त्यसविरुद्ध संघर्ष गरिरहेको बताए ।

“केपी ओली दलाल पुँजीवादको साथमा छन् । हाम्राे लडाइँ पदको तानातनका लागस होइन विचारको लडाइँ हो,” उनले भने । 

उनले आफूहरू रहेको पार्टी मूल पार्टी रहेको समेत जिकिर गरे । आफूहरू संगठनात्मक रूपमा कमजोर नरहेको नेता नेपालको भनाइ छ । “मूल पार्टी यही हो । केपी ओलीले पर्टी नै कब्जा गरे भने छुट्टै कुरा हो,” उनले भने “हामी केपी ओलीले फालेर फालिने मान्छे होइनौं । कसैले प्रधानमन्त्रीको फूर्ति लाउँछ भने त्यसको काम छैन, कसैले संख्यात्मक कुरा गर्छ भने हामी संगठनको हिसाबले कमजोर छैनौं ।”