काठमाडौं, १४ चैत । ‘तपाईहरुले किन प्रधानमन्त्री केपी शर्मा ओलीलाई हटाउन नसक्नुभएको हो ?’ नेकपा एमालेका वरिष्ठ नेता माधवकुमार नेपालले प्रस्तोताको प्रश्नपछि एकछिन माओवादी केन्द्रका अध्यक्ष पुष्पकमल दाहाल ‘प्रचण्ड’ तिर हेर्नुभयो ।
त्यसपछि भन्नुभयो, ‘यो प्रश्न सोधेर मलाई गाह्रो नबनाउनुस् मलाई । (हा हा) ।’ कार्यक्रममा एक छिन हाँसो चल्यो । कार्यक्रम थियो, प्रज्ञा भवनको प्रांगणमा । त्यहाँ उपस्थित थिए, नेपाल र प्रचण्डसहित जनता समाजवादी पार्टी (जसपा) का अध्यक्ष महन्ठ ठाकुर, नेपाली कांग्रेसका नेता मिनेन्द्ररिजाललयात नागरिक अभियन्ताहरु ।
‘नागरिकको प्रश्न, नेताहरूको जवाफ’ नामक आयोजित डबली कार्यक्रमको सुरुमा बोल्नुभएका नेता नेपालले आफू सबै प्रकारको चुनौतती सामना गर्न तयार रहेको बताउनुभएको छ । शनिबार बृहत् नागरिक आन्दोलनले आयोजना गरेको कार्यक्रममा अदालतको निर्णयपछि पार्टी २०७५ जेठ २ कै अवस्थामा फर्कनुपर्ने पनि उहाँले बताउनुभयो ।
उहाँले भन्नुभयो, ‘अदालतको निर्णयपछि पार्टी २०७५ जेठ २ कै अवस्थामा फर्कनुपर्छ । हामी त्यसको पक्षमा छौँ। त्यसका लागि म बालुवाटार जान्न, सबै प्रकारको चुनौती सामना गर्न तयार छु।’
नेता नेपालले पार्टी आन्दोलनबाट खुट्टा कमाएर हिँड्नेवाला नभएको समेत बताउनुभएको छ । उहाँले भन्नुभयो, ‘कम्युनिस्ट पार्टीमा अधिनायकवाद स्वीकार्य छैन। मूल मान्छेबाट पार्टीको विधान मिच्ने काम भइरहेको छ। हामी त्यही उपचार गर्न खोजिरहेका छौँ ।’
