बाजुराको बूढीगङ्गा नगरपालिकामा मतगणना भइरहेको छ ।
पछिल्लो प्राप्त विवरण अनुसार २ हजार ७ सय मत गणना हुँदा नेकपा एमालेबाट मेयरका उम्मेदवार रामबहादुर बानियाँ १ हजार ५ सय ९२ मतसहित अगाडि हुनुहुन्छ । नेपाली कांग्रेसका मेयर उम्मेदवार रङ्गबहादुर खातीले ९ सय ९० मतसहित बानियाँलाई पछ्याइरहनुभएको छ ।
त्यसैगरी उपमेयरका एमालेका उम्मेदवार मायाँ कुवँरले १ हजार ५ सय ५७ र कांग्रेसका रीता शाहीले १ हजार १० मत प्राप्त गर्नुभएको छ । वडा १ र १० को मतगणना सकिएको छ । अहिले वडा २ र ९ को गणना भइरहेको छ ।
वडा १ मा एमालेका रणबहादुर थापासहित प्यानल नै विजयी भएको छ । कांग्रेसका वडाअध्यक्ष उम्मेदवार लोगबहादुर थापा पराजित हुनुभयो । विजयी रणबहादुर थापाले ३ सय ५३ मत प्राप्त गर्नुभएको छ भने कांग्रेसका लोगबहादुर थापाले ३ सय १८ मत ल्याउनुभयो ।
त्यस्तै वडा नम्बर १० मा नेकपा एमालेका दलबहादुर साउद विजयी हुनुभएको छ । कांग्रेसका उम्मेदवार मोहनबहादुर बुढा पराजित हुनुभएको छ । विजयी साउदले ५ सय ४८ मत प्राप्त गर्नुभयो भने पराजित बुढाले ४ सय ९१ मत ल्याउनुभयो ।
बूढीगङ्गामा नयाँ जनप्रतिनिधि चुन्न अस्ति बिहीवार पुनः मतदान भएको थियो । त्यहाँ १३ हजार ६ सय ५९ जना मतदातामध्ये ९ हजार १ सय २८ अर्थात ६६ दशमलव ८३ प्रतिशत मतदान भएको थियो ।
