काठमाडौं । नेकपा एमालेले वरिष्ठ नेता माधवकुमार नेपालसहित चार नेतालाई स्पष्टीकरण माग गदै पत्राचार गरेको छ ।
पार्टी महासचिव ईश्वर पोखरेलले वरिष्ठ नेता माधव कुमार नेपालसहित भीम रावल, सुरेन्द्र पाण्डे र घनश्याम भुसाललाई स्पष्टीकरण माग दिन भन्दै पत्राचार गर्नुभएको हो ।
पार्टी हितविपरीत गतिविधी गरेको भन्दै एमालेले चार नेताहरूलाई स्पष्टिकरण सोधेको हो ।
स्रोतका अनुसार वरिष्ठ नेता नेपालको पत्र उहाँका स्वकीय सचिव नितेज पौडेल, नेता सुरेन्द्र पाण्डेको पत्र उहाँका स्वकीय सचिव सन्जिव पाण्डेलाई बुझाइएको छ ।
अर्का नेता भीम रावलले भने स्पष्टीकरणपत्र बुझ्न अश्वीकार गर्नुभएको छ। उहाँले पार्टीको विधान विपरीत काम प्रधानमन्त्री केपी शर्मा ओलीले गरेको भन्दै ओलीले नै जनतासामू स्पष्टिकरण दिनुपर्ने बताउनुभएको छ ।
शनिवार सम्पन्न एमाले केन्द्रीय कमिटी बैठकले पार्टीविरुद्ध गुटबन्दी गरेको, समानान्तर कमिटीहरु बनाउन थालेको र पार्टी तथा सरकारविरुद्ध षड्यन्त्र गरेको भन्दै चार नेतासँग स्पष्टीकरण लिने निर्णय गरेको थियो ।
स्पष्टिकरणपत्रमा ती अभियोगमाथि चित्त बुझ्दो स्पष्टीकरण तीन दिनभित्र पेश गर्न भनिएको छ ।
नेता नेपाल पक्षले यही चैत्र ४ र ५ गते काठमाडौँमा राष्ट्रिय कार्यकर्ता भेला आयोजना गरेको थियो । समानान्तर गतिविधि थालेको उक्त पक्षले महिला संघ र युवा संघको पनि नयाँ नेतृत्व चयन गरेको छ ।
