काठमाडौ : नेपालले भारतसँग खरिद गरेको कोरोनाविरुद्वको २० लाख डोज खोपमा आज १० लाख डोज नेपाल आउँदैछ ।
खरिद गरिएको भारतको सिरम कम्पनीले उत्पादन गरेको खोपमा पहिलो लटमा १० लाख डोज आज नेपाल आउन लागेको हो । सरकारले प्रति डोज ४ डलरमा २० लाख खोप किन्ने सम्झौता गरेको हो ।
१० लाख डोज खोप आज एयर इन्डियाको विमान मार्फत दिल्लीबाट काठमाडौं आइपुग्ने स्वास्थ्य मन्त्रालयले जनाएको छ । एयर इन्डियाको विमान दिउँसो साढे १ बजे नयाँदिल्लीबाट काठमाडौं प्रस्थान गर्ने छ ।
फागुन २३ गतेदेखि संचालन गर्ने दोस्रो चरणको खोप अभियानका लागि उक्त खोप ५५ वर्षभन्दामाथिका व्यक्तिलाई लगाइने छ ।
यसअघि भारतले अनुदानमा उपलब्ध गराएको १० लाख मात्रा ‘कोभिशिल्ड’ खोप गत माघ १४ गतेबाट लगाउन थालिएको हो ।
