डोटी – बहिनी नाता पर्ने तीन वर्षे बालिका बलात्कार गरेको आरोपमा १७ वर्षे किशोर पक्राउ परेका छन् । जिल्लाको सायल गाउँपालिकाका ती किशोरलाई शिखर नगरपालिका–११ स्थित आफन्तको घरबाट पक्राउ गरेको प्रहरीले जनाएको छ ।
घटना सोमबारको भए पनि प्रहरीले मंगलबार मात्रै पक्राउ गरेको हो । बहिनी नाता पर्ने छिमेकी काकाको छोरीलाई पानी खुवाउने भन्दै आफ्नो घर भित्र लगेर बलात्कार गरेको प्रारम्भिक उजुरी परेको थियो । बलात्कार पछि किशोर फरार रहेका थिए ।
बलात्कृत बालिकाको जिल्ला अस्पताल डोटीमा स्वास्थ्य उपचार तथा चेकजाँच भईरहेको जिल्ला प्रहरी कार्यालयका प्रहरी निरीक्षक कान्तीराज जोशीले बताए । उनका अनुसार प्रारम्भिक स्वास्थ्य जाँचमा बालिकाको रगत बगेको देखिए पनि उनको स्वास्थ्य अवस्था खतरामुक्त रहेको छ । घटनाका विषयमा थप अनुसन्धार जारी छ ।
