धनगढी,१९ चैत । धनगढी उपमहानगरपालिकाका मेयर नृपवहादुर वडले फेरि पनि नगरप्रमुख को पदका लागि पार्टीले टिकट दिने कुरा पक्का भइसकेको बताएका छन् ।
नेपाल दलित मानव अधिकार एकता मञ्च नेपालको नगर सभा तथा स्वागत कार्यक्रममा उनले नगरप्रमुखको पदका लागि नेपाली काँग्रेसले आफुलाई टिकट दिने कुरामा पक्का भइसकेको बताएका हुन् ।
‘सेवकका रुपमा अहिले सम्म काम गरिरहेको छु । र अझै पनि पार्टीले टिकट दिने कुरा लगभग कन्फर्म भइसकेको छ,’उनले भने, ‘मैले केही पनि गर्न नसकेनि म तपाईँहरूको भाइ हो दाइ हो छोरा हो र तपाईँहरूको घरको मान्छे हो । त्यसैले फेरि पनि मलाई विश्वास गरिदिनुहुनेछ भन्ने कुरामा विश्वस्त छु ।अबको चुनावमा यहाँहरूको आर्शीबाद, सदभाव र सहयोगको अपेक्षा गरेको छु ।’
मेयर वडले आउँदा दिनहरूमा पनि कुनै पनि ठाउँमा बदमासी र भ्रष्ट्राचार नगर्ने बताउँदै यदि त्यो भएको खण्डमा जिन्दगीमा राजनीति नगर्ने समेत बताए । सात सय ५३ वटा पालिकामा धनगढी उपमहानगरपालिकालाई उत्कृष्ट नगरपालिका बनाउन सफल भएको दाबी गरे ।
‘मैले आफ्नै कार्यकालमा काम गर्दै जाँदा सात सय ५३ वटा पालिका मध्ये धनगढी उपमहानगरपालिकालाई उत्कृष्ट नगरपालिका बनाउन सफल भएको छु । म देशकै उत्कृष्ट मेयर भित्र पनि पर्छु ।कुनै दिन, कुनै ठाउँ, कुनै परिस्थितिमा तपाईँहरूको शिर निहुराउन दिने छैन, म यहीबाट तपाईँहरूको बिचमा प्रतिबद्धता व्यक्त गर्न चाहन्छु’ उनले भने ।
यस्तै उनले प्रदेश र सङ्घीय सरकारले धनगढीको उपमहानगरपालिकाको आवश्यकता र माग पुरा गर्न नसकेको समेत बताए ।
